"«ئانیا؛ پەنجەرەیەک بۆ جیهانی مێینە»"؛
مانیفێستۆیەک بۆ ڕزگارکردنی ئافرەت و گەڕانەوە بۆ شکۆی ئافەرینەندە
هێنانەدیی بوونەوەرێکی نوێ بۆ ناو ئەم گەردوونە،
تەنیا ڕووداوێکی بایۆلۆژی نییە، بەڵکو پرسیارێکی قورسی ئۆنتۆلۆژی و فەلسەفییە.
کاتێک ئەو بوونەوەرە "کچ" بێت و لە ناو جەرگەی مێژوویەکی پچڕپچڕ و
کلتورێکی پڕ لە دژبەیەکدا لەدایک ببێت، بەرپرسیارێتیی باوکایەتی لە ئەرکێکی
خێزانییەوە دەگۆڕێت بۆ پڕۆژەیەکی فیکری و ڕزگاریخوازی. کتێبی «ئانیا؛ پەنجەرەیەک بۆ جیهانی مێینە»"،
کە بەم زووانە دەکەوێتە بەر دیدی خوێنەران، بەرهەمی ئەم تێڕامانە قووڵەیە؛ هەوڵێکە
بۆ گۆڕینی "باوکایەتی" لە دەسەڵاتێکی نەرێنییەوە بۆ ڕێگایەک بەرەو
ناسینی مرۆڤ.
ئەم کتێبە گەشتێکە لە نێوان دوو جەمسەری دژبەیەک. لە
لایەکەوە، گەڕانەوەیە بۆ ڕەگ و ڕیشە دێرینەکانی زاگرۆس، ئەو شوێنەی کە ژن تێیدا
نەک تەنیا ڕەگەز، بەڵکو وەک "ئافەرینەندە" (خوڵقێنەر) و سەرچاوەی پیرۆزی دەبینرا. لە
لایەکی ترەوە، ڕووبەڕووبوونەوەیەکی بوێرانەیە لەگەڵ ئەو "سێبەرە تاریکە
مێژووییەی" کە لە ئەنجامی فتوحات و سیستمە هەوەسبازەکانەوە، ژنی کوردی لە
لووتکەی شکۆوە کێش کرد بۆ بازاڕەکانی "سەبایا" و کۆیلایەتی.
لە ""«ئانیا؛ پەنجەرەیەک بۆ جیهانی مێینە»"دا، من وەک نووسەر و
باوکێک، تەنیا باس لە پەروەردە ناکەم، بەڵکو باس لە "شۆڕشی
هۆشیاری" دەکەم. ئێمە لە
سەردەمێکدا دەژین کە "بۆشایی فیکری" گەورەترین هەڕەشەیە بۆ سەر نەوەی
نوێ لە غەریبیدا. لە وڵاتێکی وەک نۆروێژ، کە دیموکراسی و ئازادی ژینگەیەکی لەبارن،
مەترسیی ئەوە هەیە کە گەنجەکانمان لە ناو "پارادۆکسی ئازادی"دا، ببنە
نێچیری ئەو ناوەندە توندڕەوانەی کە دەیانەوێت "کۆیلایەتیی مێژوویی" لە
ژێر بەرگی ئاییندا دووبارە بکەنەوە.
ئەم بەرهەمە لە چەند ڕەهەندێکی سەرەکییەوە دەدوێت:
١. ڕەهەندی
مێژوویی-فەلسەفی: دووبارە خوێندنەوەی
پێگەی مێژوویی مێینەی کورد و پاککردنەوەی نەستی کۆمەڵایەتی لە پاشماوەکانی سیستەمی کویلایەتی و کەنیزەگرتن.
٢. ڕەهەندی
پەروەردەیی-زانستی: پشت بەستن بە نوێترین
توێژینەوەکانی دەروونناسی بۆ بونیادنانی متمانە و "هەستی ناوەکی" لە
کچاندا، تا لە ناو لێشاوی کلتوری مۆدێرن و دیجیتاڵیدا خۆیان وون نەکەن.
٣. ڕەهەندی شوناس: چۆنیەتی بونیادنانی کەسایەتییەکی
"دوو-کلتوری" کە هەم ڕەگی لە زاگرۆس بێت و هەم چڵوپۆکانی لە ئاسمانی
مۆدێرنیتەدا بشکۆفێن.
"«ئانیا؛ پەنجەرەیەک بۆ جیهانی مێینە»" نامەیەکی کراوەیە بۆ
هەموو ئەو دایکان و باوکانەی کە نایانەوێت منداڵەکانیان ببنە قوربانیی
"تاقیکردنەوە و هەڵە". ئەم کتێبە تاقیگەیەکە بۆ گۆڕینی ئازارە
مێژووییەکان بۆ هێزی "نا" وتن؛ ئەو "نا"یەی کە بناغەی
کەرامەتی مرۆڤە.
چاوەڕوان بن، ئەم کتێبە تەنیا چیرۆکی ئانیا نییە،
چیرۆکی هەموو ئەو کچانەیە کە بڕیاریان داوە چیتر "بێدەنگ" نەبن و وەک
ئافەرینەندەیەک، جیهانێکی جوانتر بونیاد بنێنەوە.
لە وێبڵاگی "زێڕنووس"،
ئێمە بڕوامان بەوەیە کە "نووسین" جۆرێکە لە چاندنی تۆوی ڕووناکی. "«ئانیا؛
پەنجەرەیەک بۆ جیهانی مێینە»" یەکێک دەبێت لەو تۆوانەی کە هیوادارم لە ڕۆحی
خوێنەرانی ئازیزدا شین ببێت.
هیچ نظری موجود نیست:
ارسال یک نظر